Gerðu HK óvænt að Íslandsmeisturum saman og vinna nú aftur saman hjá ÍBV

Kristinn Guðmundsson hefur gert þriggja ára samning um að þjálfa karlalið ÍBV með Erlingi Richardssyni.

Kristinn er kominn aftur til Íslands eftir að hafa þjálfað í Noregi undanfarin ár.

Kristinn hefur þjálfað ÍBV liðið áður en þeir Erlingur unnu saman út í Eyjum fyrir rúmum tíu árum.

Erlingur og Kristinn náðu líka frábærum árangri með HK-liðið vorið 2012 þegar þeir gerðu Kópvogsliðið óvænt að Íslandsmeisturum.

Erlingur Birgir Richardsson hafði áður tekið við liði ÍBV af Arnari Péturssyni sem gerði Eyjaliðið að þreföldum meisturum á síðasta tímabili.

ÍBV varð Íslandsmeistari, bikarmeistari, deildarmeistari síðasta vetur og komst alla leið í undanúrslit í Evrópukeppnini. Sögulegt tímabil hjá frábæru liði.

Samningurinn við Kristinn var ekki eini samningurinn sem Eyjamenn staðfestu í dag.

Fannar Þór Friðgeirsson skrifaði einnig undir samning við félagið en hann er á heimleið úr atvinnumennsku í Þýskalandi.

Fannar Þór er uppalinn á Hlíðarenda og var ungur orðinn lykilmaður í liði Vals. Árið 2010 hélt hann í atvinnumennsku til Þýskalands og lék m.a. með Wetzlar og Grosswallstadt. Undanfarin tvö ár hefur Fannar Þór leikið með Hamn-Westfalen. Samningur Fannars Þórs við ÍBV er til tveggja ára.