Gerrard: Valdatíð Celtic staðið yfir of lengi

Nýráðinn þjálfari Rangers í Skotlandi, Steven Gerrard, er herskár og ætlar sér að velta nágrannaliðinu Celtic af stalli.

Celtic hefur unnið skosku úrvalsdeildina sjö ár í röð og yfirburðir liðsins í skoska boltanum ótrúlegir. Liðinu er ekkert ógnað og virðist rúlla upp deildinni án þess að hafa mikið fyrir því. Gerrard segir að það breytist nú.

„Celtic hefur fengið að hafa hlutina eins og þeir vilja allt of lengi. Þetta er risatækifæri fyrir mig að snúa valdataflinu við í Glasgow,“ sagði Gerrard.

Þetta er fyrsta aðalþjálfarastarf Gerrard en hann hefur verið að þjálfa U18 ára lið Liverpool.