Framburðurinn áreiðanlegur

Dómari í máli gegn Reuters-­blaðamönnunum Wa Lone og Kyaw Soe Oo í Mjanmar sagðist í gær meta framburð lögreglustjórans Moe Yan Naing sem áreiðanlegan. Naing kom fyrir dóm í apríl og sagði frá því þegar annar lögreglustjóri skipaði undirmönnum sínum að leiða blaðamennina í gildru.

Blaðamennirnir höfðu fjallað um þjóðernishreinsanir á Róhingjum í Rakhine-héraði þegar lögreglumaður bauðst til að hitta þá og afhenda þeim upplýsingar. Fundurinn reyndist gildra og voru þeir handteknir og hafa í dag verið í fangelsi í 143 daga.

Naing var í síðustu viku dæmdur í árs fangelsi fyrir að brjóta gegn agareglum lögreglu. Dómarinn í málinu sagði í gær að Naing þyrfti að koma aftur fyrir dóm þann 9. maí næstkomandi svo hægt væri að spyrja hann frekar út í málið.