Einn frambjóðandi afmáður af lista

Öll sextán framboðin sem skiluðu inn lista fyrir borgarstjórnarkosningarnar voru metin gild og verður því metþátttaka í næstu kosningum. Einn frambjóðandi uppfyllti þó ekki kjörgengisskilyrði og var strikaður út af lista.

Frestur til að skila inn framboðum fyrir borgarstjórnarkosningar rann út á hádegi í gær og tók yfirkjörstjórn sér rúman sólarhring í að fara yfir lögmæti þeirra. Úrskurður var kveðinn upp klukkan fjögur í dag.

Minniháttar athugasemdir voru gerðar við fimm framboð og hjálpaði yfirkjörstjórn þeim að bæta úr. „Það voru veitt góð ráð og útbúin eyðublöð. Framboðin fengu mikla aðstoð við að gera þetta rétt," segir Eva B. Helgadóttir, formaður yfirkjörstjórnar í Reykjavík.

Metfjöldi framboða, eða sextán talsins, verða því í boði á kjördag þann 26. maí og þar með tvöfalt fleiri en í síðustu borgarstjórnarkosningum árið 2014. Eva segir að ýmsu að huga í samræmi við það. Kjörseðlarnir verða mun stærri en fólk á að venjast og kjörkassarnir fyllast væntanlega fyrr. Hún telur þó nóg til af kössum en mikil vinna er framundan við að skipuleggja kosningarnar. „Það er ansi stór hópur sem býður fram þannig það er óhætt að segja að þetta verður spennandi og fjölmennt," segir Eva.

Þrátt fyrir að öll framboð hafi verið metin gild uppfyllti einn frambjóðandi sem er í sjöunda sæti hjá Íslensku þjóðfylkingunni ekki kjörgengisskilyrði, þar sem hann á heima í Svíþjóð. Þetta hefur þó ekki áhrif á listann að öðru leyti.

„Hann var afmáður af listanum þar sem hann er ekki með lögheimili hér í Reykjavík," segir Eva.