Þingið samþykkir skyndikosningar í Tyrklandi

Tyrkneska þingið hefur samþykkt að halda skyndikosningar þann 24. júní næstkomandi. Til stóð að halda kosningarnar í nóvember 2019 en Recep Tayyip Erdogan, forseti Tyrklands, boðaði til kosninganna í vikunni og sagði hann þær nauðsynlegar til að flýta þeim til þess að greiða fyrir upptöku forsetaræðis í Tyrklandi.



Tyrkir samþykktu í þjóðaratkvæðagreiðslu í fyrra að breyta stjórnarskrá ríkisins á þá vegu að færa forsetanum meiri völd.

Erdogan var áður forsætisráðherra á árunum 2003 til 2014 og mátti hann ekki gefa kost á sér aftur. Það ár gerði stjórnmálaflokkur Erdogan, AKP, stjórnarskrárbreytingar sem færðu völd til forsetaembættisins og varð Erdogan forseti.

Sjá einnig: Erdogan flýtir kosningum og verður valdamesti maður frá dögum Atatúrks



Hluti hers Tyrklands reyndi að taka völdin í Tyrklandi sumarið 2016 en án árangurs. Síðan þá hefur Erdogan styrkt stöðu sína til muna með því að handataka tugi þúsunda manna í Tyrklandi og vísa fjölmörgum úr störfum innan hersins, dómskerfisins, menntunarkerfisins og víðar.