Upp og niður hjá Tiger í Kaliforníu

Tiger Woods, frægasti kylfingur heims, er á einu höggi yfir pari eftir fyrsta hring á Genesis-mótinu í Kaliforníu sem er hluti af PGA-mótaröðinni.

Tiger byrjaði vel og fékk fugl á fyrstu holu en hann var á pari vallarins eftir fyrri níu með tvo fugla og tvo skolla.

Hann bætti við þriðja fuglinum á tíundu holu en fékk svo skramba á þeirri elleftu. Skolli fylgdi skrambanum en Tiger fékk svo tvo fugla á móti skolla á síðustu holunum.

Tiger spilaði holurnar 18 á 72 höggum eða einu höggi yfir pari og er jafn í 63. sæti, sex höggum á eftir efstu mönnum.

Patrick Cantley og Toney Finau eru efstir en þeir spiluðu á fimm höggum undir pari.