Lærðu að keyra eins og Íslendingur

Keyrðu eins og landsbyggðarbúi

Skefur ekki af rúðum



Úti á landi er snjór í að minnsta kosti níu mánuði ársins. Því eru allir vanir því að koma út á morgnana og þurfa að grafa eftir bílnum sínum. Þá er fólk ekkert að eyða tíma í óþarfa eins og að skafa af rúðunum eða sópa snjóhólinn af þakinu – vinnan bíður! Það er ekki óalgengt að sjá hvíta snjóhóla keyra um götur bæja út á landi með litla rifu í augnhæð á framrúðunni sem bílstjórinn notar til að sjá út, ekki ósvipað og á skriðdreka beint úr fyrri heimsstyrjöldinni. Sjaldgæfara er svo að sjá landsbyggðarfólk sem nennir ekki einu sinni rifunni og keyrir bara með hurðina opna og horfir þar út.

Talar digurbarkalega um aksturinn

Fólk utan af landi sem býr í höfuðborginni þekkir maður á því að það er sífellt að öskur-tala um hversu lítið mál það sé að keyra í snjó og hvað Reykvíkingar séu lélegir í hinni miklu list sem það að keyra bíl er. Af tali einhvers að norðan að dæma mætti halda að akstur í snjó krefðist meistaragráðu en sé ekki eitthvað sem fólk lærir á nokkrum mánuðum við 17 ára aldur.

Keyrir 200 metra í vinnuna

Úti á landi eru vegalengdir svo bara 200-300 metrar þannig að allur digurbarki er hálf undarlegur.

Keyrðu eins og höfuðborgarbúi

Er á sumardekkjum

Helsta ástæðan fyrir því að allt stoppar þegar það snjóar örlítið í borginni er sú að fólk er spólandi á jafnsléttu enn með sumardekkin undir á meðan aðrir keyra bara á sínum venjulega 40-50 kílómetrum yfir hámarkshraða og skilja ekkert þegar bremsan virkar ekki eins og skyldi og þau dúndra aftan á næsta mann/ljósastaur/út í sjó.

Er gríðarlega hissa yfir snjónum

Höfuðborgarbúar láta alltaf eins og það sé kraftaverk þegar það snjóar á Íslandi, á veturna. Síminn stoppar ekki því að fólk er stöðugt að senda snöpp af snjókomunni eða tísta um hvað það persónulega er óheppið að hafa þurft að skafa af framrúðunni um morguninn, eins og það sé aðalhetja lífsins.

Skiptir um akreinar í umferðarteppum

Höfuðborgarbúar gera fátt annað en að dúsa í umferðarteppum og því er alveg ótrúlegt hversu lélegir þeir eru í faginu. Fæstir hafa hugmynd um hvaða akrein sé best að vera á þrátt fyrir að hafa keyrt sömu leiðina á hverjum degi síðustu 10 árin og eru því í sífellu að troðast á milli yfirfullra akreinanna, eins og það að lenda á vitlausri akrein leiði þau í margra ára ferðalag eins og Ódysseifur forðum daga.