Pastellitir og dýramynstur fyrir karlana

Gull, brons og silfur. Snákaskinnsmynstur og sebramynstur. Pastellitir, skærfjólublár og ljósbrúnt frá toppi til táar. Svona eiga karlmenn að klæða sig næsta vetur að mati Tom Ford, sem sýndi herrafatalínu sína á tískuvikunni í New York. Fötin eru þannig sem Tom Ford myndi klæðast sjálfur, og einnig einhver miklu yngri. Þannig nær línan að ná yfir breitt aldursbil og höfðar til margra tískuáhugamanna.

Það er mikið um staka jakka, úr glansandi og bróderuðu efni. Buxurnar eru þröngar og settar saman við ökklastígvél. Innblásturinn fyrir línuna fékk Tom frá tveimur stöðum sem hann hefur búið, Los Angeles og London, og er línan skemmtileg samsetning af þeim báðum.

Tom Ford mun sýna kvenfatalínu sína í New York á morgun, þannig það er spurning hversu margar vísanir eða hugmyndir hann er að gefa okkur með því hvernig hún mun líta út.