Wenger vill hefna sín á Liverpool

Arsenal var tekið í bakaríið á Anfield fyrr í vetur er liðið tapaði þar 4-0 gegn Liverpool. Arsene Wenger, stjóri Arsenal, hefur ekki gleymt þeim leik.

„Þegar maður á langan feril eins og ég þá koma stundum töp sem munu svíða þar til maður deyr. Það sem er gott við fótbolta er að maður getur bætt upp fyrir þessi töp,“ segir Wenger en Arsenal tekur á móti Liverpool annað kvöld.

„Við þurfum því að vera einbeittir og sjá til þess að við skilum allt annarri frammistöðu að þessu sinni. Metnaðurinn og hvatningin er til staðar.“

Leikurinn verður í beinni útsendingu á Stöð 2 Sport annað kvöld og hefst klukkan 19.45.