Köstuðu látlaust upp meðan á leiknum stóð

Gríðarleg loftmengun varð þess valdandi að leikmenn krikketliða Indlands og Sri Lanka þurftu ítrekað að stöðva leikinn til þess að kasta upp. Leikurinn fór fram í Delí, höfuðborg Indlands, í dag.

Samkvæmt leiklýsendum er þetta í fyrsta sinn sem kappleikur milli landa er stöðvaður vegna mengunar í lofti, að því er fram kemur í frétt breska dagblaðsins Guardian.

„Leikmenn fóru út af vellinum og ældu,“ sagði Nic Pothas, þjálfari krikketliðs Sri Lanka, við fréttamenn eftir leikinn. „Það voru súrefnishylki í búningsklefunum. Það er ekki eðlilegt að leikmenn þurfi að þjást á þennan hátt á meðan þeir eru að spila.“

Þá brugðu margir leikmenn á það ráð að setja upp grímur og spila leikinn með þær fyrir vitum sér.

Loftmengun hefur rokið upp úr öllu valdi í Delí undanfarnar vikur. Læknar lýstu yfir neyðarástandi í borginni í síðasta mánuði þegar mengunarstig mældist langt yfir hættumörkum. Þá var loftmengunin talin á við það að reykja 50 sígarettur á dag.

Delí er ein mengaðasta borg í heimi af völdum vegryks, opinna elda, útblásturs bifreiða og verksmiðja og bruna á afgangsuppskeru í nærliggjandi sveitum.