Draumur Birgis svo gott sem dáinn og Valdís úr leik

Það gekk ekki nógu vel hjá kylfingunum okkar frá Akranesi, Birgi Leif Hafþórssyni og Valdísi Þóru Jónsdóttur, í dag.

Birgir Leifur er að spila á lokamóti Áskorendamótaraðarinnar þar sem 15 kylfingar geta náð sér í farseðil á Evrópumótaröðina. Birgir Leifur spilaði á 73 höggum í dag, eða einu höggi yfir, pari. Bæting um þrjú högg frá því í gær en langt frá því að vera nóg.

Birgir Leifur er í 39. sæti af 45 keppendum en hann þarf að enda meðal efstu manna í von um að fá einn af farseðlunum fimmtán. Það er ansi langt í þá menn.

Valdís Þóra er úr leik á móti í Abu Dhabi. Mótið er hluti af Evrópumótaröðinni. Valdís Þóra var á fimm yfir pari eftir tvo hringi og nokkuð frá því að komast í gegnum niðurskurðinn.