Segja ósamræmi í frásögn kvennanna sem var bjargað eftir fimm mánuði á Kyrrahafinu

Ósamræmi gætir í frásögn kvennanna tveggja sem var bjargað af bandaríska flotanum á Kyrrahafi aðfaranótt 27. október síðastliðins, en þær voru á reki á skútu sinni í heila fimm mánuði.

AP-fréttastofan segir að komið hafi í ljós að konurnar virkjuðu aldrei neyðarsendi skútunnar og sögðust hafa lent í skelfilegum stormi sem veðurfræðingar segja að hafi aldrei gengið yfir það svæði sem þær voru á. AP-fréttastofan segir þetta aðeins viðbót við grunsemdir sem uppi eru um frásögn kvennanna. Hefur þetta ósamræmi vakið upp spurningar þess efnis hvort þær hefðu geta komist hjá þessum hrakförum.

Nefndu aldrei neyðarstaðsetningarbúnað

Jennifer Appel og Tasha Fuiaba ætluðu að sigla lítilli seglskútu frá Hawaii til Tahiti þegar vélin í bátnum eyðilagðist. Þær sögðust hafa lent í stormi, sem stóð yfir í þrjá daga, við Hawaii-eyjur sem hafi gert út af við siglingarbúnað og vél skútunnar.

Konurnar höfðu áður sagt við The Associated Press að þær hefðu haft talstöðvar, gervihnattarsíma og GPS-staðsetningartæki og annan neyðarbúnað um borð í seglskútunni, en nefndu þó aldrei neyðarstaðsetningarbúnað. Rannsókn bandarísku landhelgisgæslunnar á máli þeirra leiddi í ljós að þær höfðu þennan búnað í skútunni en virkjuðu hann ekki.

Appel hefur látið hafa eftir séð að hún taldi að aðeins ætti að nota þennan neyðarstaðsetningarbúnað ef að lífshættulegar aðstæður væru fyrir hendi næstu 24 klukkustundirnar.

Sáu ekki fram á dauða

„Skipsskrokkurinn var heill, við flutum, við höfðum mat, við höfðum vatn og við gátum með veikum mætti stýrt skútunni,“ sagði Appel þegar rætt var við hana í Japan, þangað sem bandaríski flotinn flutti þær eftir að þeim hafði verið bjargað.

„Allt þetta gaf til kynna að við værum ekki að fara að deyja. Það sem þetta sagði okkur var að við yrðum mun lengur á leiðinni en við gerðum ráð fyrir.“

AP-fréttastofan segir Appel hafa greint frá því að á ferð þeirra hafi tvisvar sinnum komið til greina að virkja þennan búnað, annars vegar nærri Hawaii seint í júní og byrjun júlí, og nærri Wake-eyju 1. október síðastliðinn.

Aldrei heyrt af slíkri bilun

„Það er eitthvað rangt við þessa sögu,“ hefur AP-fréttastofan eftir Phillip R. Johnson, sem starfaði áður fyrir bandarísku landhelgisgæsluna. Hann fór fyrir deild innan landhelgisgæslunnar sem sérhæfði sig í leit og björgun.

Neyðarstaðsetningarbúnaðurinn sendir staðsetningu til yfirvalda í gegnum gervihnetti á nokkrum mínútum. Búnaðurinn fer sjálfkrafa í gang ef hann er á í á kafi í vatni og þá er einnig hægt að kveikja á honum.

Þegar Appel og Fuiava var bjargað sögðust þær hafa haft sex leiðir til að senda boð til umheimsins sem allar brugðust.

„Ég hef aldrei heyrt af því að slíkur búnaður bili allur á sama tíma,“ hefur AP-fréttastofan eftir Johnson.

Efast um lykilatriði í fráösgn

AP-fréttastofan segir að yfirvöld dragi í efa nokkur af lykilatriðum í frásögn kvennanna. Frásagnir þeirra stangist á við veðurupplýsingar og landafræði Kyrrahafsins.

Konurnar hafa sagt frá því að bilun hafi komið upp í siglingarbúnaði og vél skútunnar og að þær hefðu verið á barmi þess að gefast upp þegar þeim var bjargað fjarri landi.

Þær kynntust síðla árs 2016 en viku síðar ákváðu þær að fara saman í siglingu yfir Kyrrahafið, þrátt fyrir að Fuiava hefði enga reynslu af siglingum. Þær ætluð að sigla frá Hawaii til Tahítí á átján dögum, sigla síðan um Suður-Kyrrahafið og snúa svo aftur til Hawaii í október.

Þær lögðu af stað 3. maí síðastliðinn en segjast hafa lent í stormi undan Oahu-eyju. Þar hafi vindhraði náð 26 metrum á sekúndu og ölduhæð níu metrum í þrjá daga samfellt.

Enginn stormur á þessum tíma

AP-fréttstofan segir veðurstofuna í Honolulu hafa gefið út að enginn slíkur stormur hafi gengið yfir Hawaii-eyjar eða í grennd við þær á þessum tíma. Það staðfesti einnig gervihnattarmyndir frá geimrannsóknastofnun Bandaríkjanna, NASA.

Appel hefur látið hafa eftir sér að hún væri undrandi á þessum upplýsingum því að þær hefðu fengið stormviðvörun frá bandarísku landhelgisgæslunni 3. maí síðastliðinn.

Hún segir að þær hefðu hugsað um að fara í land en að nálægar eyjur, Maui og Lanai, hefðu ekki haft nógu djúpar hafnir fyrir skútuna þeirra.

AP-fréttastofan segir konurnar hafa haft nokkur tækifæri til að ná til lands á öðrum eyjum en ekki gert það. Þær hafi þess í stað ákveðið að setja stefnuna til Cook-eyja en þá hafi annar stormur skollið á sem kom í veg fyrir það.

Þegar þær voru komnar um 1.500 kílómetrum undan strönd Japans komu taívanskir sjómenn auga á þær og létu bandaríska flotann vita.