Nokkrir möguleikar í stöðunni fyrir forsetann

Lítið annað virðist vera í stöðunni fyrir Bjarna Benediktsson en að fara á fund forseta Íslands og biðjast lausnar, segir Sigurbjörg Sigurgeirsdóttir stjórnsýslufræðingur um þá stöðu sem er uppi í stjórnmálunum hér á landi í dag.

Björt framtíð sleit stjórnarsamstarfi við Sjálfstæðisflokkinn og Viðreisn í gærkvöldi.

Sigurbjörg segir að fari það svo að Bjarni fari á Bessastaði til að biðjast lausnar hafi Guðni Th. Jóhannesson, forseti Íslands, nokkra kosti í stöðunni.

Óvissa með stöðu Bjartrar framtíðar í ríkisstjórn

Hann gæti beðið Bjarna myndi sitja áfram og að Sjálfstæðisflokkurinn, Björt framtíð og Viðreisn verði áfram sem starfsstjórn. Óvíst er þó hvort ráðherrar Bjartrar framtíðar sætti sig við það og þá hefur þingflokkur Viðreisnar gefið út að hann vilji kjósa sem fyrst. Ljóst sé hins vegar að á landinu verði að vera starfandi ríkisstjórn í einhverjum formi.

„Ef sú staða kemur upp að enginn hjá Bjartri framtíð situr áfram með þessum ráðherra getur margt verið í stöðunni. Hvort aðrir flokkar myndi tímabundna stjórn með Sjálfstæðisflokknum, og eða hvort forsetinn taki það skref að skipa utanþingsstjórn uns það verður kosið að nýju,“ segir Sigurbjörg.

Forsetinn bendlaður við málið sem sprengdi ríkisstjórnina

Mörgum er enn í fersku minni þegar Ólafur Ragnar Grímsson, þáverandi forseti Íslands, neitaði að skrifa undir lausnarbeiðni Sigmundar Davíðs Gunnlaugssonar, þáverandi forseta Íslands, í apríl árið 2016 í miðju Wintris-málinu.

Sigurbjörg telur ólíklegt að slíka staði komi upp miðað við það sem á undan er gengið á síðustu dögum, fari svo að Bjarni fari á fund forsetans á Bessastöðum og biðjist lausnar.

„Mér finnst það ekki líklegt, svona miðað við ræðu forsetans á þingsetningu og hvernig hann er bendlaður við það mál sem síðar varð til þessarar niðurstöðu sem við erum að verða vitni að í dag.“

Guðni var ómyrkur í máli vegna uppreistar æru í ræðu sinni við setningu Alþingis í vikunni og sagði að við óbreytt ástand yrði ekki unað.

Kosningar í lok október ef boðað yrði til þeirra í dag

Ef ákveðið yrði að boða til kosninga í dag segir Sigurbjörg að þær gætu farið fram í lok október eða byrjun nóvember. Þá kæmi upp svipuð staða og í fyrra þegar kosningabaráttan fór fram í miðri umræðu um fjárlagafrumvarp.

Traustið hrundi með bönkunum

Hún segir málið sem sprengdi þessa ríkisstjórn vera pólitískan skandal. „Og við erum að sjá þá nokkuð tíða í kjölfar hrunsins.“

Sigurbjörg segir allar rannsóknir og kannanir sýna að traust almennings til stjórnmálamanna og opinberra stofnanna hafa hrunið með bönkunum árið 2008 og hafi ekki náð því stigi sem sást fyrir hrun.

Ekki séu miklar líkur á því að það muni nokkurn tíma ná því stigi aftur. „Við erum að horfa á allt annan almenning sem er miklu meðvitaðri um það hverjar þessar birtingarmyndir spillingar eru sem þarf að vera vakandi fyrir og taka eftir.“