Þrír Íslendingar enduðu leikinn hjá Norrköping en sigurmarkið kom aldrei

Norrköping gerði 1-1 jafntefli á útivelli á móti Kalmar í sænsku úrvalsdeildinni í fótbolta í kvöld.

Kalmar komst yfir strax á 9. mínútu leiksins en Karl Holmberg skoraði jöfnunarmarkið sautján mínútum fyrir leikslok.

Jón Guðni Fjóluson og Guðmundur Þórarinsson voru í byrjunarliði Norrköping og spiluðu allan leikinn.

Arnór Sigurðsson kom inná sem varamaður á 82. mínútu en Alfons Sampsted sat allan tímann á varamannabekknum.

Norrköping er í 5. sæti sænsku deildarinnar eftir þennan leik nú tveimur stigum frá 3. sætinu og ellefu stigum á eftir toppliði Malmö.

Kalmar er með tólf stigum minna í 12. sæti en hefur ekki tapað í síðustu fjórum leikjum sínum.