Forystukapall og átök í vændum fyrir kosningar

Gengið verður til þingkosninga eins fljótt og auðið er eftir að Björt framtíð ákvað að slíta ríkisstjórnarsamstarfi við Sjálfstæðisflokkinn og Viðreisn. Forsætisráðherra vonast til að það geti orðið strax í nóvember.

Fyrirséð er að forystukapall og innanflokksátök eru í vændum innan nokkurra flokka fyrir komandi kosningar. Þetta leiddi athugun Fréttablaðsins í ljós þar sem tekin var staðan á þeim flokkum þar sem vendinga kann að vera að vænta í ljósi yfirvofandi kosninga. 

Guðlaugur Þór í startholunum

Opinberlega halda Sjálfstæðismenn uppi vörnum fyrir Bjarna Benediktsson sem sjálfur lætur engan bilbug á sér finna. Birgir Ármannsson, þingflokksformaður Sjálfstæðisflokksins, sagði í samtali við Vísi í gær að Bjarni nyti trausts og trúnaðar í þingflokknum líkt og aðrir ráðherrar.

Landsfundur flokksins á að fara fram 3.-5. nóvember næstkomandi þar sem m.a. verður kjörinn formaður. Innan úr flokknum herma heimildir að nafn Guðlaugs Þórs Þórðarsonar utanríkisráðherra hafi heyrst ansi oft í samtölum innanflokks um leiðtogaefni undanfarinn sólarhring.

Hvort Guðlaugur meti stöðu Bjarna það laskaða eftir stjórnarslitin að hann muni taka formannsslaginn við hann á komandi landsfundi á þó eftir að koma í ljós.

 

Þorgerður og Hanna klárar í slag

Heimildir Fréttablaðsins innan úr Viðreisn herma að mikill þrýstingur sé á Benedikt Jóhannesson og formannsstóll hans sé orðinn sjóðheitur. Þung undiralda sé nú með Þorgerði Katrínu Gunnarsdóttur að taka við leiðtogataumunum í flokknum.

Þorgerður Katrín sjálf er sögð ekki útiloka neitt og reiðubúin að taka slaginn við Benedikt um formannsstólinn ef kallið kemur. Sömu sögu er að segja af þingflokksformanninum, Hönnu Katrínu Friðriksdóttur, og Þorsteini Víglundssyni, sem sögð er reiðubúin til að leiða flokkinn. Lykilfólk í flokknum talar á þá leið að breytinga sé þörf í forystu flokksins fyrir kosningar.

Birgitta hætti og Helgi komi inn

Endurnýjun kann að vera í kortunum hjá forystu Pírata komi til kosninga. Nýkjörinn þingflokksformaður, Birgitta Jónsdóttir, hafði fyrir rétt um mánuði síðan lýst því yfir í Fréttablaðinu að hún gæfi ekki kost á sér í næstu kosningum.

Í ljósi nýjustu vendinga er ljóst að næstu kosningar verða fyrr en Birgittu grunaði þegar hún gaf þessa yfirlýsingu. Ekkert fæst uppgefið opinberlega um áform Birgittu en heimildir Fréttablaðsins herma að hún líti svo á að hún sé bundin af fyrri yfirlýsingum. Með öllu óvíst er því hvort hún verði í brúnni.

Á móti kemur að nafn Helga Hrafns Guðmundssonar er nú sterklega orðað við endurkomu í forystu Pírata. Helgi Hrafn naut mikilla vinsælda á síðasta kjörtímabili og hörmuðu það margir þegar hann tilkynnti að hann gæfi ekki kost á sér í síðustu kosningum. Hann ætlaði að sitja á hliðarlínunni eitt kjörtímabil en þykir líklegur að snúa aftur.

Sigmundur Davíð skoðar nýjan flokk

Þó gróið hafi að hluta um sár innan raða Framsóknarflokksins í kjölfar mikilla átaka í forystu flokksins og milli fylkinga formannsins, Sigurðar Inga Jóhannssonar, og forvera hans, Sigmundar Davíðs Gunnlaugssonar, þá heyrast þar enn óánægjuraddir. Sigmundur Davíð hefur verið orðaður við stofnun nýs stjórnmálaflokks fyrir næstu kosningar.

Samkvæmt heimildum Fréttablaðsins er ekkert útilokað í þeim efnum og það sagður raunverulega möguleiki sem forsætisráðherrann fyrrverandi sé að skoða. Margir veittu því athygli að hann var ekki á fundi þingflokksins á föstudagsmorgun í kjölfar tíðindanna um stjórnarslit, enda kom á daginn að hann var staddur á Djúpavogi.

Á meðan Sigmundur Davíð lítur út á við, í það minnsta með öðru auganu, þá hafa háværar raddir innan flokksins kallað eftir Lilju Alfreðsdóttur í sæti Sigurðar. Óvíst er með áhuga Lilju á því en ljóst er að Sigurðar Inga kann að bíða ærið verkefni að þétta raðir flokksins fyrir komandi átök.