Sturla nýr ráðuneytisstjóri

Guðlaugur Þór Þórðarson utanríkisráðherra hefur skipað Sturlu Sigurjónsson sendiherra í embætti ráðuneytisstjóra í utanríkisráðuneytinu. Hann tók til starfa í morgun.

Í frétt á vef ráðuneytisins segir að Stefán Haukur Jóhannesson, sem hefur verið ráðuneytisstjóri frá árinu 2014, fari til starfa erlendis en muni fram að brottför stýra verkefnum sem tengjast útgöngu Bretlands úr Evrópusambandinu (Brexit).

„Sturla Sigurjónsson á að baki 30 ára feril í utanríkisþjónustunni og gegndi síðast stöðu sendiherra Íslands í Kanada. Þar áður var hann sendiherra í Danmörku, ráðgjafi forsætisráðherra um utanríkismál og sendiherra á Indlandi. Í starfi sínu hefur hann gegnt ýmsum ábyrgðarstöðum og m.a. verið skrifstofustjóri alþjóðaskrifstofu og áður varnarmálaskrifstofu utanríkisráðuneytisins,“ segir í tilkynningunni.

Gunnar Snorri Gunnarsson sendiherra, sem hefur annast verkefni sem tekngjast Brexit, fer til starfa erlendis um áramót.