Ronaldo dæmdur í fimm leikja bann

Cristiano Ronaldo hefur verið dæmdur í fimm leikja bann fyrir að ýta við dómara í 1-3 sigri Real Madrid á Barcelona í spænska Ofurbikarnum í gær.

Ronaldo byrjaði leikinn á bekknum en kom inn á sem varamaður á 58. mínútu.

Þegar 10 mínútur voru til leiksloka kom hann Real Madrid yfir með fallegu marki. Ronaldo reif úr treyjunni og fékk fyrir það gula spjaldið hjá De Burgo Bengoetxa, dómara leiksins.

Á 82. mínútu féll Ronaldo í vítateig Barcelona eftir baráttu við Samuel Umtiti. Bengoetxa gaf Portúgalanum gula spjaldið fyrir leikaraskap og því var þátttöku hans í leiknum lokið.

Ronaldo var ekki par sáttur við þessa niðurstöðu og ýtti í bakið á Bengoetxa.

Ronaldo fékk eins leiks bann fyrir rauða spjaldið og svo fjóra leiki í viðbót fyrir að ýta við Bengoetxa.

Ronaldo missir af seinni leik Real Madrid og Barcelona á miðvikudaginn og fjórum fyrstu leikjum Madrídarliðsins í spænsku úrvalsdeildinni. Þeir eru gegn Deportivo La Coruna (úti), Valencia (heima), Levante (heima) og Real Sociedad (úti).