Bruce: Ég er rétti maðurinn til að snúa gengi Villa við

Stuðningsmenn Aston Villa hafa baulað á Steve Bruce, stjóra liðsins, enda hefur liðið farið hörmulega af stað í ensku B-deildinni.

Villa er aðeins með eitt stig eftir þrjá leiki og Bruce segist skilja gremju stuðningsmannanna.

„Stuðningsmennirnir eiga að búast við meiru og ég skil þá vel. Þeir þurfa að vinna mikið fyrir miðanum á völlinn en mín skilaboð til þeirra eru þau að ég hef verið hérna áður og kann að snúa skipinu við,“ sagði Bruce borubrattur en hann hefur komið fjórum liðum upp í efstu deild.

„Ég er rétti maðurinn í þetta starf. Árangur minn í deildinni sýnir það og vonandi fæ ég tíma til þess að sanna það. Það er mikið eftir af tímabilinu.“

Villa hefur aðeins unnið 4 af 43 útileikjum síðan liðið lagði Bournemouth á opnunardegi tímabilsins árið 2015.