Ólafía passaði einu sinni börn Lauru en er nú ráshópi með henni á opna breska

Atvinnukylfingurinn Ólafía Þórunn Kristinsdóttir er að fara að keppa á opna breska risamótinu um Verslunarmannahelgina en fyrsti hringurinn verður spilaður á Kingsbarns golfvellinum í Skotlandi á morgun.

Ólafía Þórunn verður í ráshópi með Laura Diaz og Jennifer Song sem báðar hafa mikla reynslu af LPGA-mótaröðinni. Song er 27 ára gömul og frá Suður-Kóreu en hún fæddist í Bandaríkjunum og er því með tvöfalt ríkisfang. Diaz er 42 ára Bandaríkjamaður sem á tvo sigra á mótaröðinni á ferlinum.

Laura Diaz og Ólafía Þórunn þekkjast mjög vel síðan að Ólafía Þórunn var við nám í Wake Forest háskólanum.

Laura Diaz er gift Kevin Diaz, aðstoðarþjálfara golfliðs Wake Forest háskólans og hún gerði talsvert af því að aðstoða við æfingar og gefa stelpunum góð ráð.

„Þær eru miklar vinkonur og Ólafía passaði stundum börnin hennar en hún á dreng og stúlku. Ólafía er mikil barnagæla og elskar að vera innan um börn,“ segir faðir Ólafíu, Kristinn Jósep Gíslason.

Kevin og Laura Diaz eiga saman strákinn Robert Cooper (fæddur 2006) og dótturina Lily (fædd 2010).

Ólafía Þórunn stundaði nám við Wake Forest háskólann frá 2010 til 2014. Laura Diaz útskrifaðist frá Wake Forest háskólanum árið 1997 eða þegar Ólafía Þórunn var ekki orðin fimm ára.

Ólafía Þórunn hefur leik klukkan 13.49 á morgun að skoskum tíma sem er klukkan 12.49 að íslenskum tíma.