Morata stóðst læknisskoðun hjá Chelsea

Samkvæmt heimildum Sky Sports þá er Alvaro Morata búinn að standa læknisskoðun hjá Chelsea og því ekkert til fyrirstöðu að hann semji við ensku meistarana.

Chelsea er þegar farið að undirbúa að fljúga honum til Singapúr þar sem Chelsea-liðið er núna. Hann ætti því að hitta nýju félaga sína um helgina.

Morata er 24 ára gamall framherji og kemur til Chelsea frá Real Madrid. Hann var einnig orðaður við Man. Utd í sumar en United keypti Romelu Lukaku.

Hann skoraði 15 mörk í 26 leikjum fyrir Real á síðustu leiktíð. Hann hefur skorað 9 mörk í 20 landsleikjum fyrir Spánverja.