Frjáls undan oki ISIS en Mosul er í rúst

Þrátt fyrir að borgin Mosul í Írak sé að mestu nú laus undan oki Íslamska ríkisins er ærið verk fyrir höndum. Borgin er nánast rústir einar og gamli bær Mosul hefur orðið hvað verst úti, en þar vörðust vígamenn ISIS til hins síðasta. Bardagar um borgina hófust þann 17. október í fyrra, en vígamenn ISIS tóku hana sumarið 2014.

Sjá einnig: Forsætisráðherra Íraka lýsir yfir fullnaðarsigri í Mosul.

Þrátt fyrir yfirlýsingar um sigur er þó enn barist í borginni. Ljósmyndarar og fréttamenn sækja nú borgina heim þar sem öryggi er orðið meira og taka myndir og myndbönd.

Hér fyrir neðan má sjá myndir og myndbönd sem tekin voru í borginni á síðustu dögum.