Murray klár fyrir Wimbledon og á von á sínu öðru barni

Andy Murray, efsti maður heimslistans í tennis, segist vera klár í slaginn fyrir Wimbledon mótið sem hefst á morgun.

Murray hefur glímt við meiðsli í mjöðm og hefur ekki getað beitt sér að fullu á æfingum.

Skotinn segist þó vera orðinn nógu góður til að geta tekið þátt á Wimbledon sem hann vann í fyrra.

„Það verður í lagi fyrir mig að spila sjö leiki. Ef mér líður eins og í dag verður ekkert mál að komast í gegnum mótið,“ sagði hinn þrítugi Murray sem hefur unnið þrjú risamót á ferlinum. Hann mætir Alexander Bubik frá Kasakstan í fyrsta leik sínum á Wimbledon.

Murray greindi líka frá því í dag að hann og eiginkona hans, Kim Sears, ættu von á barni. Fyrir eiga þau eins árs gamla dóttur.