„Umhverfisvænn“ Trump vill fegra múrinn með sólarskjöldum

Forseti Bandaríkjanna, Donald Trump, hefur fundið leið til að fjármagna hinn umtalað múr milli Mexíkó og Bandaríkjanna. Hann ætlar að þekja hann sólarskjöldum sem virkja sólarorku. Forsetinn telur að þetta muni auk þess umbreyta veggnum og gera hann fallegri. Veggurinn á að vera 12-14 metrar. Þetta kemur fram í grein Guardian.

Mörgum kann að koma þessi ákvörðun forsetans á óvart í ljósi þess að sólarorka, sem er endurnýjanleg, telst umhverfisvæn en nýlega komst Trump í fréttirnar fyrir að segja Bandaríkin úr aðild að Parísarsamningnum. Hann hefur jafnan gagnrýnt hugmyndina um loftslagsbreytingar og sagt hana byggja á lygum frá Kínverjum. Sömuleiðis hefur hann látið þau orð falla að endurnýjanleg orka sé ekki góð fyrir hagkerfið.

Margir hafa nú þegar gagnrýnt hugmyndir forsetans og spyrja til hvers eigi að nota orkuna. Sumir segja jafnvel að sólarskildir á veggnum fegri hann ekki; veggurinn sé afleidd hugmynd sem ali á mannhatri. Sólarskildir geri hann ekki vinalegri.

Einnig hefur verið bent á að staðsetning veggsins henti ekki fyrir sólarskildi á öllum stöðum. Það þyrfti að leggja rafkapla langar vegalengdir til að nýta rafmagnið þar sem svo fáir búi við landamærin. Kostnaðurinn yrði því gífurlegur.

Að setja sólarskildi á mannvirki, hvers konar, er ekki nýjung i Bandaríkjunum. Í Boston má meðal annars finna bekki sem bera slíka skildi. Hægt er að nota orkuna í bekkjunum, meðal annars, til að hlaða símana sína. Einnig má finna sólarskildi í bandarískum fangelsum.