Mbappe: Real Madrid verið á eftir mér síðan ég var fjórtán ára

Franski framherjinn Kylian Mbappe segir að Real Madrid sé á eftir sér og hafi verið það ansi lengi.

Þetta 18 ára undrabarn sprakk út á nýliðinni leiktíð með liði sínu Monaco og er einn eftirsóttasti leikmaður heims í dag. Hann skoraði 24 mörk er Monaco varð franskur meistari og komst í undanúrslit Meistaradeildarinnar.

Man. Utd, Arsenal og Liverpool hafa öll verið orðuð við strákinn sem spilaði sinn fjórða landsleik gegn Englandi í gær. Real Madrid er líka inn í myndinni.

„Real hefur verið á eftir mér síðan ég var 14 ára. Ég hef ekki ákveðið neitt og ætla í frí núna. Svo sjáum við til hvað gerist hjá mér,“ sagði Mbappe eftir landsleikinn.

Drengurinn er samningsbundinn Monaco og mun kosta skildinginn ef eitthvað lið nær að kaupa hann.