Redknapp vill fá Terry

Birmingham er búið að bjóða John Terry, fyrrum fyrirliða Chelsea, samning fyrir næsta tímabil.

Terry er laus allra mála hjá Chelsea en hefur ekki í hyggju að leggja skóna strax á hilluna. Er enginn skortur á félögum sem vilja semja við hann.

Terry er orðinn 36 ára gamall en hann lék 717 leiki fyrir Chelsea á ferlinum og vann 13 stóra titla á 22 árum.

„Við gerðum honum gott tilboð og höfum gert allt sem við getum,“ sagði Harry Redknapp, stjóri Birmingham.

„Þetta er í höndunum á John núna en við myndum elska að fá hann til Birmingham.“

Það myndi hitt liðið í Birmingham, Aston Villa, líka gera en Villa er eitt af þeim félögum sem vill líka semja við Terry.