Alls enginn einhugur um vopnaburð

Fréttablaðið tók nokkra tali og velti upp spurningunni um hvað fólki fyndist um aukinn vopnaburð sérsveitar lögreglu á stórum viðburðum í sumar. Líkt og greint hefur verið frá er ákvörðunin umdeild, en Íslendingar mega búast við að sjá vopnaða sérsveitarmenn á fjölmennum viðburðum áfram, þar með talið á tónlistarhátíðinni Secret Solstice nú um helgina og á sjálfan 17. júní.

„Það hefði ábyggilega farið betur á því að segja frá því að þetta stæði til eins og nú hefur verið gert, svo fólk vissi hverju það hefði átt von á. Ég skil mjög vel óþægindatilfinningu fólks og undrun við að sjá vopnaða lögreglumenn við mannfagnaði. En mikilvægasta verkefni ríkisvaldsins er að tryggja öryggi borgaranna og við megum ekki gefa neitt eftir hvað það varðar," segir Friðjón R. Friðjónsson, almannatengill.

„Mér finnst það eðlilegt með hliðsjón af breyttri heimsmynd. Ég treysti lögreglunni,“ segir Edda Hauksdóttir kennari.

„Við Íslendingar höfum verið svo heppnir að hér á landi sjást nánast aldrei vopnaðir lögreglumenn og ráðamenn geta farið ferða sinna án lífvarða. 

En með atburði síðastliðins árs í Evrópu í huga finnst mér skiljanlegt að viðbúnaðarstig lögreglu sé aukið á stórum viðburðum hér á landi í sumar. Annað væri að mínu mati óábyrgt," segir Tómas Guðbjartsson læknir.

„Þetta veldur mér svosem engu sérstöku hugarangri en mér finnst þetta engu að síður frekar hallærislegt. Íslendingar hafa löngum verið stoltir af því að vera friðsöm þjóð og svona vopnabrölt er alveg á skjön við þessa fallegu sýn sem við höfum á sjálf okkur og viljum sýna umheiminum.

Þetta er enda síst til þess fallið að auka öryggistilfinningu fólks. Hver vill vera að spóka sig þar sem lögreglan telur hættu á skotbardögum? Og fælingarmátturinn á terrorista, sem ég held nú að hafi engan áhuga á okkur þar sem vart er hægt að hugsa sér ómerkilegra skotmark en Ísland, er enginn.

Byssur eru ögrun í eðli sínu og svona stælar eru líklegri til þess að framkalla ofbeldi frekar en að koma í veg fyrir það. Svo má alveg velta því fyrir sér hvort íslenskir lögreglumenn hafi yfirleitt andlegan þroska og þá yfirvegun sem þarf til þess að það megi treysta þeim fyrir hlaðinni byssu,“ segir Þórarinn Þórarinsson blaðamaður.

„Ég tel yfirvöld vita við hverju er að búast og ber eg fullt traust til þeirra sem slíkar ákvarðanir taka til þess.

Mer þykir það engu að síður skelfileg staðreynd og óþægilegt að fá þessa áminningu að það er enginn óhultur fyrir voðaverkum eins og þeim sem við höfum orðið vitni af í okkar nágranna löndum," segir Daníel Örn Hinriksson hárgreiðslumaður.

„Mín skoðun er sú að þetta verði að vera faglegt mat lögreglunnar. Við verðum þá bara að venjast breyttum heimi. En þetta er auðvitað mjög óþægilegt," segir Sirrý Hallgrímsdóttir ráðgjafi. 

„Fyrst af öllu er sorglegt að fólk telji þetta nauðsynlegt. Atburðir í kringum okkur hafa auðvitað vakið óhug og valdið sorgum.

Samt sem áður held ég að þegar tekin er ákvörðun um það sem mér finnst vera meiriháttar stefnubreyting, þurfi að eiga sér stað umræða, ekki síst á Alþingi.

Lögreglan er auðvitað að reyna að gera sitt besta en hér er ekki um að ræða átak í að sekta bílstjóra sem hafa lagt illa og ólöglega á stórviðburðum, heldur breyting á ásýnd samfélagsins. Það er mín skoðun að við eigum að forðast vopnaburð lögreglunnar eins lengi og mögulegt er.

Ég er ekki hrifinn af þessu. Telji lögreglan mikla hætti yfirvofandi, þá verður bara að segja það," segir Greipur Gíslason ráðgjafi.