Varað við því að gefa dýr í gríni

Matvælastofnun segir að best sé að leggja af gríngjörninga með dýr og að gefa dýr í gríni. Óheimilt er að selja, gefa eða afhenda dýr einstaklingi sem ástæða er til að ætla að hafi ekki aðbúnað, getu eða vilja til að annast dýrið í samræmi við lög um velferð dýra.

Þetta kemur fram í frétt á vef Matvælastofnunar þar sem segir að dæmi séu um að mætt sé með lömb, grísi, hana og önnur dýr við ýmis tækifæri, svo sem afmæli og önnur tilefni. Það geti verið gert sem grín, sem skemmtun eða sem fræðsla.

Segir Matvælastofnun að slíkir gjörningar rati gjarnan í fjölmiðla og vekji ánægju meðal þátttakenda en ekki endilega meðal dýranna. Þetta sé andstætt lögum um velferð dýra.

Bendir Matvælastofnun meðal annars á að bændum og öðrum dýraeigendum sé óheimilt samkvæmt lögum um velferð dýra að selja eða gefa frá sér dýr nema þeir viti fyrir fram að viðtakandi vilji eignast dýrið og hafi viðunandi aðstöðu og getu til að hugsa um það.

Segir Matvælastofnun að jákvætt sé að auka nálægð almennings við dýr en það þurfi að gera það á réttan hátt og í samræmi við lög.

„Best er að leggja af gríngjörninga með dýr og að gefa dýr í gríni. Við sýningu, flutning og alla meðhöndlun dýra þarf að gæta fyllstu nærgætni þannig að þau verði ekki hrædd, passa upp á vatn og fóður og ætíð forðast hávaða og læti,“ segir í frétt Matvælastofnunar.