Fannar Ingi og Berglind fögnuðu sigri í Leirunni

Fannar Ingi Steingrímsson, 19 ára kylfingur úr GHG, fagnaði sínum fyrsta sigri á Eimskipsmótaröðinni á Hólmsvelli í Leiru í dag er hann kom í hús á fimm höggum undir pari eftir þrjá hringi. Þá vann Berglind Björnsdóttir úr GR fimmta sigur sinn á ferlinum á Eimskipsmótaröðinni.

Fannar lék fyrsta hring mótsins á einu höggi yfir pari en kom sér í góða stöðu með því að leika á fimm höggum undir pari. Lék hann lokahringinn á einu höggi undir pari og lauk leik með þriggja högga forskot á Ragnar Már Garðarsson úr GKG.

Dagbjartur Sigurbrandsson og Ingvar Andri Magnússon úr GR deildu 3-4. sæti en þeir eru 14 og 17 ára gamlir.

Í kvennaflokki var það Íslandsmeistarinn í holukeppni frá síðasta sumri, Berglind, sem sigraði á mótinu í Leirunni en hún kom í hús á tveimur höggum yfir pari og lauk leik á sex höggum yfir pari.

Háði hún baráttu við Ragnhildi Kristinsdóttir úr GR á lokahringnum en Ragnhildur er einmitt stigameistari síðasta árs á Eimskipsmótaröðinni.

Næsta mót fer fram þann 2-4. júní næstkomandi á Hamarsvelli í Borgarnesi áður en tekur við Íslandsmótið í holukeppni í Vestmannaeyjum og Íslandsmótið í höggleik í Hvaleyrinni.