Vissi ekki að hann hefði unnið tugi milljóna í lottó

Fjölskyldumaður á höfuðborgarsvæðinu fékk nokkuð skemmtilegt símtal frá Getspá á mánudaginn þegar honum var tilkynnt að hann hefði unnið rúmlega 46,5 milljónir á lottómiða sem hann hafði keypt á lotto.is.

Maðurinn hafði ekki hugmynd um að hann hefði unnið tugi milljóna og var gleðin því eðlilega mikil en vinningshafinn er með stóra fjölskyldu auk þess sem hann var að vinna að endurbótum á eigin húsnæði. Hann þurfti hins vegar að stöðva endurbæturnar en vinningurinn gerir honum nú kleift að halda uppbyggingunni áfram.

„Einnig eru margir aðrir útgjaldapóstar fyrir fjölskylduna sem vinningurinn léttir undir með t.d. tannréttingar, ferming, íþróttir svo eitthvað sé nefnt. Fjölskyldan ætlar sem fyrr segir að halda áfram með endurbætur á húsnæðinu og jafnvel að leyfa fjölskyldunni að fara allri saman erlendis í frí en það hefur hún aldrei getað veitt sér fyrr,“ segir í tilkynningu Getspár.