Everton til í að galopna veskið fyrir Gylfa

Sky Sports hefur heimildir fyrir því að Everton sé til í að greiða 25 milljónir punda fyrir Gylfa Þór Sigurðsson.

Það gerir 3,3 milljarða íslenskra króna. Þessi áhugi Everton á Gylfa er ekki nýr af nálinni og var fastlega búist við því að félagið myndi teygja sig langt til þess að fá íslenska landsliðsmanninn.

Það þarf ekkert að fjölyrða um hversu öflugur Gylfi hefur verið á þessari leiktíð en hann hefur borið lið Swansea City á herðunum.

Southampton er líka eitt þeirra liða sem hefur áhuga á að kaupa Gylfa.