Strákarnir hans Kristjáns í stuði | Noregur lagði Frakkland

Svíar halda áfram að fara á kostum undir stjórn Kristjáns Andréssonar. Í kvöld fóru til Rússlands í undankeppni EM og völtuðu yfir heimamenn, 21-29.

Svíarnir byrjuðu leikinn ótrúlega og náði 1-8 forskoti. Staðan í leikhléi var 10-17. Niklas Ekberg markahæstur í liði Svía með átta mörk og Jim Gottfridsson skoraði sex.

Svíar eru með fullt hús eftir þrjá leiki og komnir hálfa leið á EM.

Liðin sem mættust í úrslitaleik HM í janúar, Noregur og Frakkland, mættust í Noregi. Norðmenn voru ekki búnir að gleyma úrslitaleiknum í París og ætluðu að hefna. Það gerðu þeir líka.

Norðmenn unnu, 35-30, í jöfnum og spennandi leik þar sem þeir voru þó alltaf skrefi á undan. Í lokin gáfust Frakkar upp og Norðmenn fögnuðu afar sætum sigri.

Norðmenn komust upp að hlið Frakka á toppi riðils 7 með sigrinum en þeir eru augljóslega komnir til þess að vera á meðal þeirra bestu.

Sander Sagosen skoraði heil þrettán mörk fyrir Norðmenn í kvöld en Nedim Remili var atkvæðamestur í liði Frakka með sjö mörk.

Úkraína er svo komið á topp riðils Íslands eftir 26-23 sigur gegn Tékkum. Öll liðin í riðlinum voru með tvö stig fyrir þessa umferð.