Vinnuslys í nýbyggingu við Suðurlandsbraut

Slökkviliðinu á höfuðborgarsvæðinu barst tilkynning klukkan 14:50 í dag um vinnuslys í nýbyggingu við Suðurlandsbraut.

Samkvæmt upplýsingum frá slökkvliðinu varð slysið við Suðurlandsbraut 8 þar sem verið er að byggja nýjar höfuðstöðvar Vodafone.

Maðurinn, sem er starfsmaður verktakans sem byggir á staðnum, féll niður fjóra metra og var fluttur á slysadeild en ekki er vitað hversu alvarlega slasaður hann er.

Uppfært klukkan 16:24: Slysið varð í bílastæðahúsi sem verið er að byggja bak við nýbyggingarnar við Suðurlandsbraut 8 annars vegar og Suðurlandsbraut 10 hins vegar.

Bílastæðahúsið verður bæði notað af þeim sem munu koma til með að starfa á Suðurlandsbraut 8 og Suðurlandsbraut 10.

Fréttin var síðast uppfærð klukkan 16:45.