Útigangsmaður braust inn á stigagang og bað íbúa um að fróa sér

Lögregla varð að hafa afskipti af útigangsmanni, sem fór í óleyfi inn á stigagang í fjölbýli á Lindagötu í nótt. Maðurinn beraði sig fyrir íbúa og bað hana um að fróa sér, en íbúinn hringdi á lögregluna.

Samkvæmt upplýsingum frá lögreglunni á höfuðborgarsvæðinu er maðurinn góðkunningi lögreglunnar og hefur hún áður haft afskipti af honum vegna innbrots í íbúð á sama stað. Mbl.is greinir frá því að maðurinn hafi ítrekað valdið íbúum fjölbýlisins ónæði, undanfarnar vikur.

Hann hafi til að mynda vakið íbúana upp á nóttunni með því að ýta á dyrabjöllurnar í von um að einhver hleypi sér inn í sameignina. Íbúarnir hafi rætt sín á milli og sammælst um að hleypa ekki ókunnugum inn í sameignina, en sumir þeirra óttast að mæta umræddum manni seint á næturnar.

Í gærnótt hafi ung kona svo mætt manninum í sameigninni, en hann hafi legið út í horni, strokið sér og beðið hana um að „hjálpa sér.“