Telur að það vanti 4.600 íbúðir til að ná jafnvægi á fasteignamarkaði

Íbúðalánasjóður hefur unnið greiningu á vöntun á fasteignamarkaðnum að beiðni Þorsteins Víglundssonar, félags-og jafnréttismálaráðherra.

Leiðir greining sjóðsins í ljós að á landsvísu vantar alls 4.600 íbúðir á markaðinn til þess að jafnvægi náist að teknu tilliti til þess að um 1.600 íbúðir eru á hverjum tíma í skammtímaleigu til ferðamanna.

Í frétt á vef Velferðarráðuneytisins segir að heildarþörf á uppbyggingu á íbúðarhúsnæði hér á landi á næstu þremur árum séu alls 9.000 íbúðir en fjölgun eigna hefur ekki haldist í hendur við mannfjöldaþróun í landinu undanfarin ár.

Fram kemur í greiningu sjóðsins, sem er hluti af ítarlegri greiningu á stöðu húsnæðismála sem Íbúðalánasjóður annast fyrir aðgerðahóp um húsnæðisvandann sem fjórir ráðherrar sitja í, að almennt sé „hægt að miða við að íbúðum þurfi að fjölga um það bil um 1.700 á ári á landinu öllu til að mæta eðlilegri þróun.“

Minnisblað Íbúðalánasjóðs um mat þess á þörf fyrir íbúðarhúsnæði má nálgast hér.