Þrír í haldi vegna hnífstungu á Akureyri

Þrír eru í haldi lögreglunnar á Akureyri vegna hnífstungu í Kjarnaskógi í gær. Morgunblaðið greindi fyrst frá málinu en þar kemur fram að maður hafi verið stunginn í lærið í Kjarnaskógi eftir deilur sem komu upp milli tveggja manna á staðnum.

Sá sem stakk manninn flúði af vettvangi en sá sem varð fyrir árásinni var fluttur með sjúkrabíl á Fjórðungssjúkrahúsið á Akureyri. Lögreglan á Akureyri segir í samtali við Vísi að þegar viðbragðsaðilar mættu á vettvang til að hlúa að þeim sem varð fyrir árásinni hafi ástand hans ekki litið vel út, en er ekki lengur í lífshættu.

Morgunblaðið segir vitni hafa komið lögreglunni á slóð árásarmannsins og var hans því leitað við Hrísalund. Skömmu eftir að hans var leitað í Hrísalundi fannst maðurinn í bíl sem var stöðvaður skammt frá.

Lögreglan á Akureyri segir í samtali við Vísi að þrír hafi verið handteknir vegna málsins og vistaðir í fangageymslu lögreglu. Þeir bíða þess að verða yfirheyrðir en einn af þessum þremur er grunaður um árásina. Hinir tveir eru taldir tengjast henni og þá eru þeir einnig grunaðir um fíkniefnabrot.

Uppfært klukkan 09:50: 

Lögreglan á Norðurlandi eystra greinir frá því á Facebook-síðu sinni að árásin hafi átt sér stað klukkan tvö í gær og að maðurinn hafi verið stunginn tvisvar í lærið.

Sá sem grunaður er um árásina flúði vettvang en hann fannst í bíl um kvöldmatarleytið í gær. Í bílnum fannst einnig barefli og exi.

Skömmu síðar var par handtekið grunað um aðild að málinu og fannst nokkuð magn af fíkniefnum í fórum þeirra.

Alls voru 5 handteknir í tengslum við það fíkniefnamál.

Parið og árásaraðilinn í hnífstungumálinu voru vistuð í fangageymslu en þremur aðilum var sleppt að loknum yfirheyrslum vegna fíkniefnamálsins.