Mjölnismenn himinlifandi eftir dóm Hæstaréttar

Jón Viðar Arnþórsson, formaður Mjölnis, segir að þar á bæ sé mönnum gífurlega létt eftir að Hæstaréttur sýknaði Mjölni og bardagakappann Árna Ísaksson í máli sem fasteignasalinn Lárus Óskarsson höfðaði vegna fótbrots sem Lárus varð fyrir í steggjun sinni í húsakynnum Mjölnis árið 2014.

Málið snerist um það hvort Mjölnir og Árni væru skaðabótaskyldir í málinu en Héraðsdómur Reykjavíkur hafði áður kveðið upp dóm í málinu og komist að þeirri niðurstöðu að Mjölnir og Árni væri skaðabótaskyldir.

Hæstiréttur kvað hins vegar upp annan dóm í dag og því ljóst að hvorki Mjölnir, né Árni eru skaðabótaskyldir.

Sjá einnig: Steggjunin sem endaði með fótbroti: Árni úr járni og Mjölnir sýknaðir í Hæstarétti

Í samtali við Vísi segir Jón Viðar að mönnum hjá Mjölni sé gífurlega létt eftir tíðindi dagsins. Hann segir að málið hafi legið þungt á félagsmönnum.

„Það er ótrúlega góð tilfinning að þessu máli sé loksins lokið. Þetta er búið að vera byrði á okkur í þennan langa tíma. Okkur er gríðarlega létt. “

Spurður hvort að þeir hafi átt von á þessum niðurstöðum segir Jón að menn hafi verið temmilega bjartsýnir fyrir daginn í dag.

„Þeir lögfræðingar sem við töluðum við þótti öllum þetta mál hrikalega ósanngjarnt. Við reiknuðum með að þetta yrði okkur í hag en við auðvitað vissum það ekkert, svo þetta var mikil gleði.“

Eru ennþá steggjanir í Mjölni?

„Nei, við tókum fyrir allar steggjanir eftir að þetta mál kom upp. Núna ætlum við að sjá til með framtíðina, það hefur verið alveg gífurleg eftirspurn og hafði aldrei gerst neitt fyrir þetta mál. Svo við ætlum bara að skoða þetta og sjá til.“

Að sögn Jóns er Árni Ísaksson, oftast kallaður Árni úr járni mjög léttur eftir dóm Hæstaréttar, „enda þar maður á ferð sem ekki vill gera neinum mein.“

Spurður hvort að fasteignasalinn sé enn velkominn í Mjölni segir Jón að hann hafi ekki leitt hugann að því en hann sjái því þó ekkert til fyrirstöðu, þó hann ábyrgist ekki vinsældir hans á staðnum.

„Jú jú, ef hann vill koma og glíma hérna er hann alveg velkominn. Hversu vinsæll hann verður get ég ekki ábyrgst. Ég held það séu ansi margir reiðir út í hann.“

„Það var mikil reiði hjá félagsmönnum þegar kæran kom fyrst upp og margir sem áttu ekki til orð vegna þessa.“