Mikið keppnisskap skilaði þriðja sætinu

Jakob Svavar Sigurðsson tryggði sér þriðja sætið í gæðingafimi í Meistaradeild Cintamani í hestaíþróttum á fimmtudagskvöld með Gloríu frá Skúfslæk. Jakob mætti vel undirbúinn til leiks og átti góða sýningu í forkeppninni, en setti meiri kraft í hana þegar komið var í úrslitin.

,,Já, ég er með mikið keppnisskap,“ svaraði Jakob Svavar aðspurður, en hann kom fimmti inn í úrslitin,  hækkaði einkunn sína umtalsvert, hífði sig upp um tvö sæti og kom sér fyrir á verðlaunapalli. Lokaeinkunn 7,74.

Gæðingafimi er spuni, mjög krefjandi keppnisgrein sem reynir á mikla nákvæmni í reiðmennsku en jafnframt fimi, getu, snerpu, ganghæfileika og kraft í hestinum.

Gefnar eru einkunnir fyrir gangtegundir og flæði annars vegar og æfingar og fjölhæfni hins vegar, en árangur í gæðingafimi ræðst ekki síst af útfærslu og frumkvæði knapans.

Meðfylgjandi er myndband af Jakobi Svavari og Gloríu frá Skúfslæk í A-úrslitum, en sýnt var frá keppninni í beinni útsendingu á Stöð 2 sport. Viðtöl við knapana sem höfnuðu í tveimur efstu sætunum á mótinu mun birtast á Vísi síðar í dag.

Niðurstöður A-úrslita í gæðingafimi 2017 í MD Cintamani í hestaíþróttum:

1             Bergur Jónsson - Katla frá Ketilsstöðum - 8.63      

2             Elin Holst - Frami frá Ketilsstöðum - 7.84      

3             Jakob Svavar Sigurðsson - Gloría frá Skúfslæk - 7.74      

4             Árni Björn Pálsson - Skíma frá Kvistum - 7.71      

5             Sylvía Sigurbjörnsdóttir - Héðinn Skúli frá Oddhóli - 7.61