Stuttmynd um baráttu venjulegs fólks við sundlaugarstökkpall slær í gegn

Stuttmynd sem sýnir venjulega Svía glíma við tíu metra háan stökkpall við sundlaug í fyrsta skipti hefur farið sigurför um heiminn. Myndin, sem er í heimildarmyndastíl og ber nafnið Tíu metra turninn, er þannig vinsælust í flokki skoðana hjá hinu víðlesna New York Times og hefur verið það undanfarna daga.

Myndin var sýnd á Sundance kvikmyndahátíðinni í ár og hlaut styrk frá Sundance-stofnuninni sem styður við bakið á sjálfstæðum kvikmyndaframleiðendum.

Handrit myndarinnar er ekkert og fyrirmælin frá leikstjórunum, önnur en að reyna að stökkva af pallinum, engin.

67 mættu sem höfðu aldrei stokkið úr viðlíka hæð

Markmiðið með gerð myndarinnar var að framkvæma einhvers konar sálfræðitilraun. Höfundarnir, Maximilien Van Aertryck og Axel Danielson, vildu sýna fólk í klemmu - draga upp raunsæa mynd af efasemdum að þjaka meðaljón.

„Við höfum öll séð leikara í kvikmyndum gera sér upp efasemdir en sjaldan sem þær hafa verið raunverulega fangaðar í heimildarmyndum.“

Niðurstaðan hafi verið að láta fólk spreyta sig á stökkpalli. Með auglýsingum á netinu fundu leikstjórarnir 67 einstaklinga sem aldrei höfðu stokkið úr slíkri hæð og tilbúnir voru að taka þátt í myndinni. Þáttakendurnir fengu um 3500 íslenskar krónur í sinn hlut, burtséð frá því hvort þeir stykku eða ekki.

Leikstjórarnir komu fyrir sex myndavélum og fjölda hljóðnema til að fanga sálarstríð fólks og baráttuna við pallinn -  og ekki síst baráttu fólks við sig sjálft.

Á daginn kom að um 70% þeirra sem tóku þátt ákváðu að láta sig gossa fram af. Fjöldi þeirra gerðu það fyrir tilstilli hópþrýstings sem og nærveru myndavélanna - „sem gerði hegðun þeirra þeim mun áhugaverðari,“ útskýra leikstjórarnir.

Stuttmyndina má sjá hér að neðan.