FH upp fyrir Hauka eftir sigur á Akureyri

FH vann þægilegan sigur á Akureyri, 33-27, í 18.umferð Olís-deildar karla í handknattleik í dag en leikið var í Kaplakrika.

Með sigrinum fara FH-ingar upp fyrir Hauka í Olís-deildinni og er liðið í öðru sæti deildarinnar. Liðin eru aftur á móti með jafnmörg stig, eða 22 stig. Afturelding sem fyrr á toppi deildarinnar.

Akureyri er með 13 stig eins og þrjú önnur lið, Grótta, Fram og Stjarnan og eru þau á botni deildarinnar.

Staðan í hálfleik í dag var 16-14 og náðu FH-ingar fínum tökum á leiknum í þeim síðari.

Einar Rafn Eiðsson skoraði níu mörk fyrir FH í leiknum og var hann atkvæðamestur.  Mindaugas Dumcius skoraði einnig níu mörk fyrir Akureyri í leiknum.