Nicklaus: Rory þarf að leggja harðar að sér

Einn besti kylfingur allra tíma, Jack Nicklaus, segir að Rory McIlroy þurfi að leggja meira á sig ætli hann sér að verða yfirburðamaður í golfheiminum.

McIlroy er annar á heimslistanum á eftir Jason Day. Norður-Írinn hefur unnið fjögur risamót á ferlinum en Nicklaus vann átján á sínum tíma. Met sem stendur enn.

„Rory er einn af þessum ungu mönnum sem býr yfir ótrúlegum hæfileikum. Hann hefur náð árangri og sýnt fólki hvað hann getur. Ef hann vill aftur á móti hafa yfirburði verður hann að leggja enn harðar að sér,“ sagði Nicklaus en fínn vinskapur er á milli hans og Norður-Írans.

„Þetta er allt undir honum komið. Hvort hann sé til í að leggja það á sig sem þarf til að vera yfirburðamaður í íþróttinni. Hann hefur svo sannarlega hæfileikana. Þetta snýst um viljann hjá honum. Hverju hann er til í að fórna og leggja á sig.“