Liv maður ársins hjá Frjálsri verslun

Liv Bergþórsdóttir, forstjóri Nova, er maður ársins í atvinnulífinu á Íslandi árið 2016, að mati dómnefndar Frjálsrar verslunar. Liv hefur á tíu árum byggt Nova úr engu í að verða um 16 milljarða króna virði. Verðlaunin verða afhent formlega í dag í veislu sem Frjáls verslun heldur Liv til heiðurs. Svo segir í tilkynningu frá Frjálsri verslun. 

Árni Oddur Þórðarsson, forstjóri Marel, hlaut verðlaunin í fyrra og athafnamaðurinn Róbert Guðfinnsson á Siglufirði árið áður. 

Í mati dómnefndar kemur fram að Liv hljóti þennan heiður fyrir stórhug, uppbyggingu á stórfyrirtæki frá grunni, útsjónarsemi, áræði við að brjóta upp fákeppni og framúrskarandi hæfileika í stjórnun sem kristallast í liðsheild, gleði og samhug starfsmanna og hafa gert Nova að verðmætu og eftirsóknarverðu fyrirtæki meðal fjárfesta. 

Að neðan má sjá tilkynninguna frá Frjálsri verslun

Það var mikil viðurkenning fyrir Liv og starfsmenn Nova þegar bandaríska eignastýringarfyrirtækið Pt Capital Advisors keypti hlut Novator í Nova í október fyrir um 16 milljarða króna. Það skal áréttað að salan er ekki að fullu gengin í gegn.

Tekjur Nova verða um 8,4 milljarðar króna á árinu og hafa næstum sjöfaldast frá 2008. Hagnaður þessa árs er á annan milljarð – en félagið hefur notið samfellds hagnaðar sex ár í röð.

Nova hefur 15% markaðshlutdeild á fjarskiptamarkaði en um 35% hlut á farsímamarkaði. Viðskiptavinir Nova eru yfir 150 þúsund.

Nova hefur til þessa aðeins starfað á farsímamarkaði en tekur núna skrefið inn á netmarkaðinn með ljósleiðaraþjónustu. Félagið tók þátt í snjallvæðingu farsímans á Íslandi með því að leiða uppbyggingu 3G- og 4G-þjónustu. Núna er stefnan sett á að snjallvæða heimilin en sífellt fleiri tæki á heimilum verða nettengd í framtíðinni.

Þetta er í 29. sinn sem Frjáls verslun stendur að þessari útnefningu og eru þetta elstu verðlaun í viðskiptalífinu á Íslandi. 

Á Liv hafa hlaðist verðlaun á undanförnum árum. Hún hefur verið valin markaðsmaður ársins, fengið FKA-viðurkenninguna, viðskiptaverðlaun Viðskiptablaðsins og núna bætist stóra rósin í hnappagatið; maður ársins í atvinnulífinu á Íslandi hjá Frjálsri verslun. 

Að auki hefur Nova mælst með ánægðustu viðskiptavinina á farsímamarkaði sjö ár í röð, samkvæmt Íslensku ánægjuvoginni, og Nova hefur tvisvar verið valið markaðsfyrirtæki ársins.

Gleðin er kjarninn í Nova og er henni beitt sem samkeppnisvopni. Lagt er upp úr því að bæði starfsmenn og viðskiptavinir séu ánægðir. Liv hefur tekist einstaklega vel að byggja upp liðsheild og samhug starfsmanna. Alls 137 stöðugildi eru hjá Nova, þar af um 70 í sölu og þjónustu við viðskiptavini.

Liv er í yfirgripsmiklu viðtali í áramótablaði Frjálsrar verslunar og þar kemur fram að hún þakkar það samstarfsfólki sínu að vera valin maður ársins í atvinnulífinu hjá Frjálsri verslun. Hún segir að þetta sé fyrst og fremst viðurkenning fyrir starfsmenn Nova.

Einn nánasti samstarfsmaður hennar við uppbyggingu Nova – og sá sem hóf reksturinn með henni í upphafi árið 2006; Jóakim Reynisson, framkvæmdastjóri tæknisviðs Nova, lýsir Liv þannig að hún sé einstaklega fær í að sjá stóru myndina. 

Beðinn að lýsa Liv í sex orðum segir hann: „Skemmtileg, hugmyndarík, kappsfull, lausnamiðuð, vinnusöm og mjög félagslynd.“

Eiginmaður Liv er Sverrir Viðar Hauksson, framkvæmdastjóri hjá Lýsingu, og eru börn þeirra fjögur. Fyrir átti Sverrir tvö og Liv eitt. Saman eiga þau Sverri Konráð, tólf ára.

Verðlaunin verða afhent formlega í dag, 29. desember, kl. 16:00 á Radisson Blu Sögu, í veislu sem Frjáls verslun heldur Liv til heiðurs.