Valdís Þóra komst á lokaúrtökumótið

Kylfingurinn Valdís Þóra Jónsóttir úr Leyni komst áfram á lokaúrtökumótið fyrir Evrópumótaröð kvenna. Hún hafnaði í tíunda sæti á fyrra stiginu sem kláraðist í dag.

Valdís Þóra spilaði fjórða og síðasta hringinn á úrtökumótinu í dag á 75 höggum eða þremur höggum yfir pari vallarins. Hún lék hringina fjóra á samtals tólf höggum yfir pari og varð sem fyrr segir í tíunda sæti.

Um 30 kylfingar komust á lokastigið og komst Valdís Þóra því örugglega áfram en hún hefði þurft að spila á 23 höggum yfir pari til að missa af lokastiginu.

Lokaúrtökumótið fer fram í Marokkó eins og mótið sem Valdís Þóra var að klára en það hefst á laugardaginn.