Stjórnin segist hafa heimild

Breska stjórnin segir að þegar tillaga um útgöngu Bretlands úr Evrópusambandinu var borin undir þjóðaratkvæðagreiðslu hafi þjóðin reiknað með því að ríkisstjórnin myndi hrinda niðurstöðunni í framkvæmd.

Jeremy Wright, aðalmálflutningsmaður bresku stjórnarinnar, segir að breska þingið hafi auk þess samþykkt lög um þjóðaratkvæðagreiðsluna í fullri vitund um að ríkisstjórnin myndi fylgja niðurstöðunni eftir.

Þetta eru rök stjórnarinnar í málaferlum fyrir Hæstarétti Bretlands, sem hófust í gær. Þar er tekist á um það hvort stjórnin geti upp á eigið einsdæmi, í samræmi við niðurstöðu þjóðaratkvæðagreiðslunnar í sumar, virkjað útgönguákvæði sáttmála Evrópusambandsins og samið um útgöngu.

Yfirréttur í London komst fyrir nokkrum vikum að þeirri niðurstöðu að breska þjóðþingið þyrfti að taka ákvörðunina. Stjórnin áfrýjaði þeirri niðurstöðu til Hæstaréttar, sem tók málið til meðferðar í gær og ætlar að gefa út úrskurð síðar í vikunni.

Wright sagði fyrir dómi í gær að þingið hafi, þegar lög voru sett um þjóðaratkvæðagreiðsluna, ekki sett neinn fyrirvara um að stjórnin eigi ekki að sjá um framkvæmd niðurstöðunnar. 

Fréttin birtist fyrst í Fréttablaðinu