Bein útsending: Úrslitin ráðast á milli Carlsen og Karjakin

Úrslitin ráðast í heimsmeistaraeinvígi stórmeistaranna Magnus Carlsen og Sergey Karjakin í kvöld. Eftir tólf hefðbundnar viðureignir stóðu meistararnir jafnir að vígi og þurfti því að grípa til bráðabana. Fyrsta skákin fór fram 11. nóvember og eru því tæpar þrjár vikur að baki í einvíginu sem fram fer í New York í Bandaríkjunum.

Sjá einnig: Heimsmeistaratign og 120 milljónir króna undir í New York í kvöld

Skákin hefst klukkan 19 og verður fyrirkomulagið eftirfarandi (upplýsingar af Skák.is):

1. Fjórar skákir með umhugsunartíma 25 mínútur auk þess sem tíu sekúndur bætast á hvern leik. 

2. Verði enn jafnt eftir skákirnar fjórar tefla þeir allt að fimm tveggja skáka einvígi með umhugsunartíma 5 mínútur auk þriggja sekúndna fyrir hvern leik.

3. Ef svo ólíklega vill til að enn verði jafnt tefla þeir svonefnda Armageddon-skák. Þar hefur hvítur fimm mínútur í umhugsunartíma en svartur fjórar mínútur. Svörtum dugar jafntefli til sigurs.

Hér að neðan er bein útsending af taflborði þeirra Carlsen og Karjakin og fara sérfræðingar Chess24 yfir stöðuna.