Neymar lenti í árekstri í morgun

Hinn brasilíski Neymar, leikmaður Barcelona, lenti í árekstri í morgun þegar hann var á leið að hitta liðsfélaga sína fyrir leikinn gegn Real Sociedad í kvöld.

Barcelona á útileik gegn Real Sociedad í kvöld og Neymar var á ferð á Ferrari Spider bifreið sinni á fund með liðsfélögum sínum áður en hoppað skyldi upp í flugvél áleiðs til San Sebastian.

Það vildi þó ekki betur til en svo að Neymar lenti í árekstri sem hann gat þó gengið ómeiddur frá. Vinstri hlið glæsibifreiðarinnar skemmdist þó illa og brasilíumaðurinn knái eflaust brugðið við áreksturinn.

Strax í kjölfarið hafði Neymar samband við starfsfólk Barcelona sem sá til þess að hann kæmist á flugvöllinn í tíma. Fastlega er gert ráð fyrir að Neymar verði í byrjunarliði Barcelona í leiknum í kvöld. Liðið þarf nauðsynlega á sigri að halda til að minnka forystu Real Madrid á toppnum.

Leikur Real Soceidad og Barcelona verður í beinni útsendingu á Stöð 2 Sport 2 HD í kvöld og hefst útsending klukkan 19:40.