Ólafía Þórunn í beinni á Golfstöðinni

Sýnt verður beint frá síðustu þremur keppnisdögunum á sterku móti Evrópumótaraðarinnar í golfi, Fatima Bint Mubarak Ladies Open, á Golfstöðinni.

Ólafía Þórunn Kristinsdóttir er í forystu eftir fyrsta keppnisdaginn en að miklu er að keppa fyrir hana. Bæði eru miklar fjárhæðir í boði fyrir efstu kylfinga en sigurvegarinn fær rúmar níu milljónir króna í sinn hlut.

Þá myndi góður árangur á mótinu laga stöðu Ólafíu á stigalista Evrópumótaraðarinnar og auka líkur á að hún nái að endurnýja keppnisrétt sinn fyrir næsta tímabil.

Útsending frá mótinu í Abú Dabí hefst klukkan 09.00 í fyrramálið, rétt eins og á föstudag og laugardag.