Andri í góðum málum eftir fyrsta hring á Spáni

Andri Þór Björnsson, kylfingur úr GR, er á þremur höggum undir pari eftir fyrsta dag á úrtökumóti fyrir Evrópumótaröðina í golfi en fjórir íslenskir kylfingar taka þátt á öðru stigi á Spáni um þessa helgi.

Andri, Þórður Rafn Gissurarson, Haraldur Franklín Magnús og Guðmundur Ágúst Kristjánsson, allir úr Golfklúbbi Reykjavíkur, taka þátt í öðru stigi en aldrei hafa jafn margir karlkyns kylfingar komist á annað stigið.

Andri sem leikur á Las Colinas-vellinum í Alicante fékk örn á annarri holu á fyrsta degi og þrjá fugla á fyrri níu en fékk tvo skolla á fyrstu fjórum holunum.

Tókst honum að halda pari á seinni níu með tveimur fuglum og tveimur skollum á lokaholunum en hann deilir fjórtánda sæti ásamt tíu öðrum kylfingum en efstu tuttugu komast á lokastigið.

Þórður, Haraldur og Guðmundur náðu sér ekki á strik í gær en þetta er í fyrsta skiptið sem Haraldur og Guðmundur reyna fyrir sér í úrtökumóti fyrir Evrópumótaröðina.

Þórður sem leikur á velli rétt fyrir utan Valencia lék á fimm höggum yfir pari í gær og er í 77. sæti fyrir annan daginn. Haraldur lék á 76. höggum í gær, fjórum höggum yfir pari og er í 76. sæti.

Guðmundur Ágúst lék á 73. höggum og er í 64. sæti á tveimur höggum yfir pari fyrir annan hringinn.