Bökuðu tvíburaköku fyrir Gleðibankann

Þegar auglýst var kökukeppni í félagsmiðstöðinni í Hlíðaskóla lögðu þær Heiðrún, Svanhildur Dóra, Svanhildur Margrét og Valgerður Birna á ráðin, bökuðu og hönnuðu. Afraksturinn var skemmtileg og skrýtin kaka sem var líka mjög góð á bragðið.  En hvernig kaka?

SD: Þetta er kaka með hálfpartinn tveimur hausum, tvíburakaka.



H: Á botninum er marens, svo súkkulaðikrem og rjómi með bláum matarlit og ávöxtum. Þar ofan á eru svampbotnar sem líta út eins og smábörn sem eru græn og appelsínugul á litinn.

V: Svo tókum við piparkökuform og tókum út úr kökunum og svissuðum litum svo það var komin græn stjarna í appelsínugula svampbotninn og appelsínugul í þann græna.

H: Og svo settum við fullt af gúmmíi og nammi og kökuskrauti og piparkökum frá síðustu jólum á hliðarnar.

SM: Og þá var komin marens­kaka með smábarnaandlitum!

Hvernig gekk að vera fjórar saman að baka?

SD: Það gekk bara vel. Ég þeytti rjóma og skreytti.

H: Það var æðislegt. Mér finnst gaman að baka með vinum mínum. Og mér er alveg sama hvort við vinnum eða ekki.

V: Það gekk frekar vel. Við vorum ekki alltaf sammála í byrjun en svo komumst við að niðurstöðu með lýðræði.

Hvað eruð þið búnar að vera vinkonur lengi?

SM: Mjög lengi. Við Heiðrún vorum saman í leikskóla og Valgerður B. og Svanhildur D. líka. Við hittumst allar í 1. bekk í Hlíðaskóla, en urðum samt ekki alveg strax vinkonur.

Ætlið þið að verða bakarar þegar þið verðið stórar?

H og SM: Ég veit ekki.

V: Maður veit aldrei??

Greinin birtist fyrst í Fréttablaðinu 1. október 2016.