Dagný á toppi tilverunnar í Portland

„Það er ekki alveg klárt að við förum á EM en ef við spilum vel þá fáum við þrjú stig,“ segir Dagný Brynjarsdóttir, miðjumaður íslenska kvennalandsliðsins í fótbolta, í viðtali við Fréttablaðið en stelpunum okkar nægir eitt stig í næstsíðasta leik liðsins í undankeppni EM 2017 á föstudaginn gegn Slóveníu. Ísland vann Slóveníu, 6-0, í fyrri leik liðanna en stelpurnar bóka engan stórsigur.

„Þegar við unnum þær 6-0 í fyrra var það síðasti leikur ársins og þá vorum við að toppa, en við spiluðum okkar besta leik. Ég held að 6-0 sigur þar gefi ekki alveg rétta mynd og segi að við eigum að rústa þeim heima en auðvitað komum við og spilum upp á sigur,“ segir Dagný.

Stefnt á núllið

Stelpurnar okkar eru efstar í riðlinum með fullt hús stiga og hafa ekki enn fengið á sig mark. Tveir leikir eru eftir og viðurkennir Dagný að það væri gaman að halda sama dampi í varnarleiknum.

„Ég viðurkenni alveg að ég var ekkert farin að pæla í þessu fyrr en ég las þetta í fjölmiðlum. Auðvitað væri gaman að stefna á það í síðustu tveimur leikjunum að klára þetta á núllinu. Við reynum að spila eins góðan varnarleik og við getum þannig að ég held að við séum óbeint að stefna að því að halda hreinu út mótið,“ segir hún.

Íslenska liðið hefur spilað stórvel og rústað næstbestu liðum riðilsins með markatölunni 10-0. Liðið hefur tekið miklum framförum undanfarin misseri.

„Við höfum farið stigvaxandi sem lið og liðsheild síðan Freyr tók við. Núna er sami hópur búinn að vera saman í nokkur ár sem ég tel mjög mikilvægt. Við erum farnar að þekkja vel hver inn á aðra og spilum bæði varnarleikinn og sóknarleikinn sem liðsheild. Við vinnum hver fyrir aðra sem er rosalega mikilvægt,“ segir Dagný.

Mögnuð miðja

Dagný er hluti af frábærri þriggja manna miðju íslenska liðsins en ásamt henni spila þar markahæsti leikmaður Íslands frá upphafi, Margrét Lára Viðarsdóttir, og hin eitilharða Sara Björk Gunnarsdóttir sem nýverið gekk í raðir eins besta liðs Evrópu.

„Það er frábært að spila með þeim. Þær eru báðar ótrúlega góðir leikmenn og Margrét Lára goðsögn í íslenskum fótbolta. Við erum búnar að spila svolítið marga leiki saman á miðjunni og erum farnar að þekkja hver aðra mjög vel. Ef við höldum allar áfram að bæta okkur verður miðjan og liðið bara sterkara,“ segir Dagný.

Lífið ljúft í Portland

Draumur Rangæingsins rættist í byrjun árs þegar hún gekk í raðir Portland Thorns í Bandaríkjunum. Fótboltaáhuginn í Portland er einn sá allra mesti vestanhafs og liðið eitt það besta í bandarísku kvennadeildinni.

„Þetta er búið að vera frábært. Ég held að þetta sé hápunktur kvennaknattspyrnunnar. Við vorum með að meðaltali 16.000 manns á leik og vorum með fullt hús á síðasta leik. Ég get ekki ímyndað mér að einhvers staðar annars staðar sé betra að vera hvað varðar áhorfendur, aðstöðu og leikmannahópinn. Mér finnst þetta geðveikt og er rosalega ánægð þarna úti.“

En hvernig er lífið í Portland og hvað gerir atvinnukona í fótbolta þar?

„Ég bý með danskri landsliðskonu. Sumarið er búið að vera mjög gott og við höfum verið duglegar að liggja í sólbaði á sundlaugarbakkanum. Svo förum við að versla og einnig er margt að skoða þarna. Það eru margir stórir garðar og hægt að fara í fjallgöngur þannig að við gerum mikið af því,“ segir Dagný.

Ræður sér ekki sjálf

Þó að Dagný telji sig vera á hátindi kvennaboltans hefur hún ekkert um það að segja í raun og veru hvar hún spilar á næsta ári. Þannig virkar einfaldlega bandaríska kerfið.

„Þegar ég skrifa undir samninginn er ég að skrifa undir samning við deildina en eins og er þá er Portland með réttinn á mér. Portland má gera það sem það vill við mig eftir tímabilið hvort sem mig langar að vera þarna áfram eða ekki. Það er alltaf hægt að skipta á mér og einhverjum öðrum leikmanni sem ég hef lítið um að segja. Eins og staðan er í dag þá reikna ég með því að vera áfram hjá Portland á næsta ári,“ segir Dagný Brynjarsdóttir.