Vettel: Þetta er besti verðlaunapallur í heiminum

Nico Rosberg vann sína 21. keppni á ferlinum. Hann tók forystuna í ræsingunni og lét hana aldrei af hendi. Hver sagði hvað eftir keppnina?

„Ég er virkilega glaður að hafa náð að vinna á Ítalíu. Ég átti frábæra ræsingu sem skóp restina af keppninni,“ sagði Rosberg á sínum fimmtugasta verðlaunapalli í Formúlu 1. hann hefur nú minnkað bilið í heimsmeistarakeppni ökumanna niður í tvö stig.

„Mercedes-Benz átti góðan dag og ég er stoltur af því að eiga þátt í því. Við ættum þó að vera fleiri í baráttunni um fyrsta sætið,“ sagði Lewis Hamilton á verðlaunapallinum. Hann var ekki sáttur við sjálfan sig enda klúðraði hann ræsingunni að eigin sögn. Forskot Hamilton í heimsmeistarakeppninni er nánast að engu orðið.

„Þetta er besti verðlaunapallur í heiminum. Við verðum að virða árangur Mercedes. Við erum að berjast af fullu til að reyna að ná þeim. Ég get ekki lofað því hvenær það gerist en vonandi fljótlega,“ sagði Sebastian Vettel á verðlaunapallinum. Vettel var fagnað gríðarlega af viðstöddum heimamönnum.

„Við ákváðum að reyna að setja góðan tíma í lokinn. Við vorum ekki nógu snöggir til að ná í stig. Við erum á leiðinni í betri keppnir á næstunni,“ sagði Fernando Alonso sem varð 14. á McLaren bílnum en náði fljótasta tímanum.

„Ég veit ekki hvað klikkaði í ræsingunni en þegar ég var að reyna að bjarga keppninni þá fór það illa með dekkin,“ sagði Max Verstappen sem varð sjöundi á Red Bull bílnum.

„Nei ég veit ekki hvaðan þetta er að koma. Kvyat mun fá sitt tækifæri til að reyna að endursanna sig. Ég mun hringja í Pierre Gasly núna. Hann verður ekki í bílnum í Singapúr, sama hvað Pierre segir. Allt sem bilar hjá okkur virðist bila hjá Kvyat. Það er ekki sanngjarnt að dæma hann eftir því,“ sagði Helmut Marko sem er yfirmaður ökumannsmála hjá Red Bull og Toro Rosso. Gasly sagði sjálfur í spænskum fjölmiðlum að hann myndi taka sæti Kvyat fyrir næstu keppni. Ungi ökumaðurinn virðist hafa hlaupið á sig.

„Botninn á bílnum var skaddað og rafgeymirinn var að ofhitna svo við ákváðum að stoppa bílinn. Ég get ekki ákveðið hvort orðrómurinn er sannur. Ég er bara að vinna mína vinnu,“ sagði Daniil Kvyat sem féll úr leik á Toro Rosso bílnum.

„Okkur skorti heildarhraða í dag. Ég átti góðan framúrakstur í gegnum Curva Grande þegar ég tók tvo bíla. Þetta var skemmtileg keppni. Allar keppnir hér eftir eru mikilvægar enda erum við í harðri baráttu við Force India,“ sagði Valtteri Bottas sem varð sjötti á Williams bílnum.

Williams endurheimti fjórða sætið í stigakeppni bílasmiða af Force India. Williams hefur þriggja stiga forskot.